Татарстаныште Пасун кечыже эртен

Марий Элын делегацийже Татарстаныште Пасун кечыштыже лийын. Пошкудо кундемыште кажне ийын эртыше Регион- влак кокласе ончер-демонстрацийым аграрий- влак шке коклаштышт «Пасун кечыже» маныт. Эпидемиологий ситуацийым ончыде, тудо теният эртен. Тушко Российын тӱрлӧ кундемлаже гыч да Марий Эл гычат еҥ- влак миеныт. Мемнан республике гыч ял озанлык министрын алмаштышыже Андрей Кондратенко, «Марий Элысе компетенций рӱдер» организацийым вуйлатыше Павел Раевский да ял озанлык предприятийлан еҥышт лийыныт. Мероприятийыште кушкылым ончен-куштымаште да вольык озанлыкыште шумо сеҥымаш, кызытсе жаплан келшыше ял озанлык технике дене пашам ыштыме опыт, экономикым да АПК инфраструктурым вияҥдыме йодыш- влакым каҥашыме. Тиддеч посна ял озанлык предприятий- влакын ыштен лукмо продукцийыштым ончыктышо выставке пашам ыштен. Пасун кечыже радамыште Андрей Кондратенко Росагролизингым вуйлатыше Павел Косов, «Ростсельмаш» Комбайн заводын» регионлам вияҥдыме шотышто директоржо Константин Ряснов, Россий ял озанлык министерствын кушкыл, механизаций, химизаций да кушкылым аралыме шотышто департаментшым вуйлатыше Роман Некрасов, кундемласе министрествылан еҥышт дене пашаче вашлиймашым эртарен. Нуно ончыкылык вашкыл, лизингын льготан программыже- влакым шыҥдарыме, фермер- влаклан полышым пуымо, техникым ситарыме йодыш- влакым каҥашеныт.