Таче Марий Элым вуйлатышын инаугурацийже эртен

         Таче Республикыштына кугу событий. Марий Элым вуйлатышым сайлымаште эн шуко йӱкым погышо Юрий Зайцевын  Республикым вуйлатыше должностьыш шогалме Торжественный церемонийже эртен. Инаугураций Эрик Сапаев лӱеш опера да балет Кугыжаныш академический театрыште лийын. Тиде кӱлешан мероприятийыш Россий Президентын Юл кундем округышто полномочный представительже Игорь Комаров толын. Федераций Советым вуйлатыше Валентина Матвиенкон да шкенжын лӱмжӧ дене сенатор Константин Косачёв, Кугыжаныш Думым вуйлатыше Вячеслав Володинын да шкенжын лӱмжӧ дене Кугыжаныш Думын депутатше Сергей Казанков, Йошкар-Олан да Марий Элын митрополитше Иоанн да молат саламлен ойленыт. Икымше гана тыгай торжественный церемонийыште Пӱтынь марий йоча хорын 100 наре участникше мурен. Хор Россий ден Марий Элын Гимныштым, марий композитор Иван Ключников-Палантайын «Йывырте» произведенийжым йоҥгалтарен. Марий Элым вуйлатышын инаугурацийжым вияш эфирыште ончыктымо.
             Фото: Марий Элым вуйлатышын организаций да аналитик виктемже.