Пий пурылмо деч аралалташ кӱлеш

              Республикыштына пий пурылмо деч вара 243 йоча медицина полышым налын. Идалык тӱналтыш гыч кундемна мучко вольыкын тӱжемат 174 гана пурлмыжым, шӱвылтымыжым да удыралмыжым регистрироватлыме. Тидыже ончычсо ийдеч 24 процентлан да ятыр ийысе кокла кӱкшыт деч 24 утла процентлан шагалрак. Пурылмо еҥ- влак кокла гыч 298 еҥже 14 ияш марте йоча- влак улыт, тидыже 25 процент утла лиеш.- Увертара Роспотребнадзор виктем. Вольык дене вучыдымо вашлиймаш деч вара медицина полыш чыла кундемыштат кӱлеш лийын. Эн шукыжо Йошкар-Олаште- 476 еҥ але 40 процент, Волжскышто 124, 10 процент да Медведево районышто 112, 9 процент. Тӱшка чот дечын 815 еҥже пий дечын эмганен, ӱмашсе деч 22 процентлан шагалрак. 29 утла процентыштыже пий кержалтме деч 14 ияш марте йоча- влак эмганеныт. Тыге 243 йочалан медицина полышым пуымо. Пий пурылмо, удыралме да шӱвылтымӧ случай чыла районыштат палемдалтын. Роспотребнадзор виктем ушештара: орымо чер- вирусан пӱсӧ, колымашке шуктышо инфекций чер. Тудо ынже пиж манын тыршаш гына лиеш, а вияҥше черым эмлыме йӧн уке. Чер пурылмо, удыралме да шӱвылтымӧ годым пижын кертеш. Адакшым черле вольыкын шӱвылвӱдыштыжӧ орымаш возбудитель черже рашеммешке лу кече ончычак лийын кертеш. Айдемын капышкыже логалмеке тудо нерв корно дене кап-кыл мучко шарла, вуйдорыкыш шуэш, тудо пуалеш, нерв системын пашажым шалата да айдеме илыш дене чеверласа.