Марий Элыште ыштыме осал пашан кугытшо элысе кокла кӱкшыт деч палынак шагалрак

          Марий Элыште ыштыме осал пашан кугытшо Российысе да Юл кундем округысо кокла кӱкшыт деч палынак шагалрак. Юрий Зайцев республикыште правопорядкым ыштыме шотышто Координационный совещанийын заседанийжым эртарен. Тудо палемден: криминогенный ситуацийым терген шогалтеш гынат, граждан да организацийлан, поснак изи да кыдалаш бизнесын субъектше- влакын праваштым пӧртылтымӧ пашам вияҥден колташ кӱлеш. 2022-шо ийыште правопорядкын могай лиймыже нерген докладым Эл кӧргӧ паша министр Андрей Вырвич ыштен. Правам аралыше органын, тыгак Правительстве дене пырля ыштыме мерыштлан кӧра оперативный обстановкым икшырымын кучымо. Кодшо ийын тудо 2021-ше ий деч кугун ойыртемалтын огыл. Пуштмаш, виешлымаш, толымаш, шолыштмаш шагалрак регистрироватлалтын. Район- влак коклаште утларак криминальныйлан Волжск ден Йошкар-Ола шотлалтыт. Начар тенденций семын интернет-ресурс да мобильный кыл полшымо дене ыштыме осал паша, банк счёт гыч шолыштмаш да ондалкалымаш ешаралтын. Тиде оптышыш утларакше илалше- влак логалыт. Нунын дене умылтарыме да моло полыш паша эртаралтеш. Марий Элым вуйлатыше тиде аланыштат пашам вияҥдаш кӱштен.
             Фото: Марий Элым вуйлатышын  администрацийжын увер дене пашам ыштыше пӧлкаже.