Санкций жапыште Марий Элысе промышленный предприятий продукцийым ныл пачаш шукырак лукташ тӱналын

          Санкций жапыште Марий Элысе промышленный предприятий продукцийым ныл пачаш шукырак лукташ тӱналын. Уверым ончыктышо арверым ямдылыше да лукшо «Ната-Инфо» предприятий элыштына ончылно кая. Тудо шкенан дене ыштен лукмо виктарыше системым да шке программыжым кучылтеш. Кодшо ийын тудо 2021-ше ий дене таҥастарымаште кушмашым 433 процентлан кугемден. Теҥгече Марий Элым вуйлатыше Юрий Зайцев тудо предприятийыш миен. Продукций дене палыме лийын, конструктор бюрош, погымо да выставка цехыш, паша участкылаш пурен, разработчик- влак дене вашлийын да вуйлатыше- влак дене компанийым ончыкыжо вияҥдыме йодышым каҥашен. Генеральный директор Александр Шевкоплясын мутшо почеш, предприятий ямдылыме гыч ыштен лукмо марте тичмаш циклым шукта. Оборудованийым оборона министерствын объектлаштыже, спорт сооруженийлаште, тӱвыра да телевизтонный мероприятийлаште кучылтыт. Тушто ончыктымо сӱретын качествыже эн кӱлешанлан шотлалтеш. Кодшо ийын продукцийым 316 миллион теҥгелан колтымо, ныл миллионым производствым вияҥдаш виктарыме. Тений 10 миллион теҥге инвестицийым кондаш палемдыме. «Ната-Инфом» 1989-ше ийыште ыштыме. Кызыт тудо Марий Машиностроитель заводын ик предприятийжылан шотлалтеш. Тудын лукмо светодиодан видеоэкранже- влакым эн кугу да калык погыныман событийлам ончыктымаште кучылтыт: спартакида, универсиада, чемпионат-влак, эсогыл Йошкар Площадьыште Сеҥымаш Парадат тудын деч посна ок эрте.
             Фото: Марий Элым вуйлатышын  администрацийжын увер дене пашам ыштыше пӧлкаже.