Кеҥеж мучаш марте 620 миллион теҥгеаш кок кугу инфраструктура проектым илышыш шыҥдарен шуктат

              Республикыштына кеҥеж мучаш марте 620 миллион теҥгеаш кок кугу инфраструктура проектым илышыш шыҥдарен шуктат. Кызыт у бульварым чоҥен пытарат да рекреаций зонын ийымше йыжыҥжым ыштыме паша мучашыш лишемеш. Регионлаште инвестиций проект- влакым шыҥдарымашым Россий Правительстве председательын алмаштышыже Марат Хуснуллинын эртарыме заседанийыште каҥашыме. Тушто Марий Элым вуйлатыше Юрий Зайцев участвоватлен. Марий Эл элысе субъектлаште корным чоҥымо дене 7-ше верыште, «Юл эҥерым тазаҥдымаш» федерал проектым ыштыме дене 8-ше верыште улеш. Моло корныштат сай вашталтыш палдырна. Мутлан, Медведево посёлкышто кокымшо кварталыште Сеҥымашлан 75 ий темме лӱмеш бульвар пашаш колталтшаш. Кызыт объектым 75 процентлан шуктымо. Тачысе кечылан светодиодан фонтаным ыштат, июнь мучаш марте корно палым, саварым вераҥдат, коляске дене коштшо- влаклан йӧным, корно разметкым ыштат, йӱштӧ вӱдым ситарыме да йоктарен колтымо системым пашаш колтымо. Контрактым 303 миллион наре теҥгелан ыштыме. Аныклымаш 74 миллион утла теҥгеш шуын. Тиде оксам Медведево ден Йошкар-Ола кокласе Черняков уремыште рекреаций зонын кокымшо йыжыҥжым чоҥымашке колтат. Икымше йыжыҥжым тений кеҥежым мучашлышаш улыт. Кызыт йӱрвӱд йогымо канализацийым чоҥат, йолын коштмо верлашке тулым пурташ кабельым шупшыт, газ сетьым кусарат. Тиддеч посна инфраструктура  бюджет кредит кӱшеш Йошкар-Ола аэропортышто пассажир терминалым чоҥымо проект илышыш шыҥдаралтеш. Контрактым ик миллиардат 500 миллион теҥгелан пеҥгыдемдыме.
             Фото: Марий Элым вуйлатышын  администрацийжын увер дене пашам ыштыше пӧлкаже.