Йошкар-Оласе уремлам олмыкташ 15-ше апрельыште лектыт

           Йошкар-Оласе уремлам олмыкташ 15-ше апрельыште лектыт. Тиде кече гыч  марий рӱдӧ олан корнылаштыже калыкле проект почеш паша тӱҥалеш. Тидын нерген мэрын икымше алмаштышыже Лев Покровский увертарен. Икымше объект-влак радамыш Зарубин, Анциферов, Строитель урем- влак пуреныт. Моло уремлаште тиде паша май ден июньышто эртаралтеш. Эн шуко пашаже, мутат уке, кеҥеж жаплан логалеш. Пытартыш объектым корно пашазе- влак сентябрь мучаш марте ыштен шуктышаш улыт, - рашемден олам вуйлатышын алмаштышыже. Чылаже тений 12 меҥге кужытыш шуйнышо 11 уремым олмыктат. Тиде пашалан 343 миллион теҥге оксам палемдыме.
         Фото: Лев Покровскийын видеожо гыч.