Марий Элыште тений 582 тӱжем квадрат метр илыме верым ыштен шукташ палемденыт
Марий Элым вуйлатыше Александр Евстифеев Российыште регионлам вияҥдыме шотышто правительство комиссий Президиумын заседанийыштыже участвоватлен. Тудым видеокыл йӧн дене Россий Правительство председательын алмаштышыже Марат Хуснуллин эртарен. Вашлиймашыште тенийсе икымше кварталыште илыме верым чоҥен, пашаш колтымо лектышым каҥашыме да идалык мучашлан могай лектыш лийшашым ончымо. Тыгак бюджет гыч шийвундым налше организаций- влакын коммунал полыш дене пайдаланымыштлан оксам кузе тӱлымышт нерген ойлымо. Марий Элыште 582 тӱжем квадрат метр илыме верым ыштен шуктышаш улыт. А прогноз почеш тений 420 тӱжем квадрат метр лийшаш. Але кодшо ий дене таҥастарымаште 105 утла процент. Январь гыч март марте 87 тӱжем квадрат метрым ыштен шуктымо але кодшо ийысе деч 176 процентым. Пайдаланыме коммунал ресурслан организаций- влак жапыштыже тӱлен шогат. Тиде пашалан бюджет гыч нине организаций- влаклан 208 миллион теҥгем ойырымо. Икымше майлан шотлымаште парым уке. Республикыште экономический лӱдыкшыдымылыкым ышташ манын, региональный штабым ыштыме. Тудым Александр Евстифеев вуйлата. Штаб экономикым ӱшанлын вияҥдашлан эн кӱлешан мерпориятий- влакын планжым пеҥгыдемден.