Марий Элысе кучем республикысе предприятийым панкрут радамыш шумо деч утарен

Марий Элысе кучем республикысе предприятийым панкрут радамыш шумо деч утарен. Теҥгече Марий Элым вуйлатыше Александр Евстифеев «Мостремстрой» кугыжаныш унитар предприятийым вияҥдыме йодыш дене совещанийым эртарен. 2017-ше – 2018-ше ийлаште тудо панкрут радамыш лишемын. Расчёт счётшым петырыме улмаш.  Ышытме паша деч пурышо окса ончычсо парымым петыраш, пашадарым пуаш, налогым тӱлаш да кӱлеш материалым налаш  ситен огыл. Чыла тидыже 2018-ше ийын икымше кварталыштыже пашам чарен шогалтымашке шуктен, 189 пашазе паша деч посна кодын,- каласен Александр Евстифеев. Республикысе кучем вигак полышым пуаш лийын. Александр Евстифеев предприятийым пашаш пӧртылташ решенийым луктын. Тыге ик тылзе гыч 2018-ше ийын апрельыште «Мостремстрой» пашам уэш тӱҥалын. Транспорт да корно озанлык министр Александр Герасименкон мутшо почеш, предприятий панкрут радамыш ынже логал манын, тӱҥ мероприятий- влак планым ыштыме, тудлан кусарышаш кӱвар- влакын спискыштым ямдылыме. Тыге кодшо ийын ноябрьыште «Мостремстрой» шке ӱмбакыже 182 кӱварым налын. Предприятийым вуйлатыше Андрей Лежнин увертарен: кодшо ийын 24 миллион теҥге налог парымым пӧртылтымӧ, тений эше 40 миллионым тӱлымӧ да парымым петырыме. Тыге правительствын ямдылыме программыжлан кӧра, Мостремстрой тений тичмаш рентабельный лийшаш,- каласен Алекандр Евстифеев. Кызыт предприятий тичмаш куатын ышта,заказ ситышын уло.