Йошкар-Оласе 11-ше номеран лицейым 500 верлан кумдаҥдат

Теҥгече Марий Элым вуйлатыше Александр Евстифеев Йошкар-Олаште Александрова лӱмеш 11-ше номеран лицейыш миен. Тушто тудо ончычсо бассейнын зданийжым рончен кораҥдыме да олмешыже 500 верлан ешартыш пӧлемым чоҥаш лийме йодышым рашемден. 11-ше лицей ик эн тошто тунемме тӧнежлан шотлалтеш. Теҥгече тудлан 195 ий темын. Ик эн палыме школын у пӧртшым 1981-ше ийыште чоҥымо, но таче марте ик ганат капитально олмыктымо огыл. Александр Евстифеев класс- влакым ончен лектын. Директоржо Людмила Андрееван мутшо почеш, тунемаш чыла йӧн уло. Кызыт тушто тӱжемат 89 йоча тунемеш. Но тушко тунемаш толаш кумылан- влак пеш шуко улыт. Лицейыште кок смене дене туныктат. Сандене ончычсо бассейным кораҥден, 500 верлан у корпусым чоҥаш шонат. Бассейнже 2006-шо ий годсек пашам ок ыште. Лицейыште тунемше- влак тӱрлӧ кӱкшытан олимпиадылаште эре сеҥыше радамыште улыт. Чыла тунемше элысе да республикысе ВУЗ-лаште умбакыже шинчымашым нӧлта. Кодшо ийын 7 выпускник ЕГЭ-ште эн кӱкшӧ 100 баллым поген. Лицей шкежат тӱрлӧ конкурслаште сеҥышыш лектеш, 2008-ше ийыште «Российын эн сай школжо» лӱмым  налын. 23 туныктышо Российын эн сай туныктышыжо лӱмым нумалеш.