Марий Эл гыч вич еш «Талукын ешыже» конкурсын финалышкыже лектын

Марий Эл гыч вич еш «Талукын ешыже» конкурсын финалышкыже лектын. Республикыштына «Талукын ешыже» конкурс мучашлалтын. Вич еш регионысо йыжыҥыште эн шуко баллым поген, сеҥышыш лектын. Ынде тӱҥ приз верч кучедалаш тӱҥалыт. Нунын презентаций ден анкетыштым Москош колтымо. Конкурс вич номинаций дене эртен: Шуко шочшан еш, Самырык еш, Ялысе еш, Российын шӧртньӧ ешыже, «Еш- йӱлам аралыше». Тушто 25 еш мастарлыкшым да моштымашыжым ончыктен. «Шӧртньӧ еш» номинацийыште Волжск ола гыч Минзагутдиновмыт еш сеҥышыш лектын. Нуно шукерте огыл кӱ сӱаным палемденыт: 67 ият пеле пырля илат. «Ялысе еш» лӱмым Шернур район гыч Малининмыт еш налын. Иван ден Светлана 27 ий пырля илат, кум йочашт уло. «Еш- йӱлам аралыше» номинацийыште Волжский район гыч Кудрявцевмыт еш ончылно лийын. Алексей ден Екатерина вич йочам ончен- куштат. «Самырык еш» семын Звенигово район гыч Дмитрий ден Анна Дёминмытым палемдыме. А «Шуко шочшан эн сай еш» лӱм Провой вел гычак Алексей ден Елена Пырковмытлан логалын. Нунын 11 икшывышт уло. Конкурсын лектышыже почеш Сеҥыше еш- влак нерген каласкалыше «Талукын ешыже» почётан книга савыкталтшаш. Российысе конкурсым Москошто иктешлаш тӱҥалыт.