31-ше май - тамак деч посна илыме Тӱнямбал кече

31-ше майыште тамак деч посна илыме Тӱнямбал кече палемдалтеш. Тудым Тӱнямбал тазалыкаралтыш организаций эртара. Кампаний кышкарыште тиде койыш дене кучедалме йӧн- влак ончыкталтыт. Тиде кечым 1987-ше ийыште пеҥгыдемдыме. Тений Тӱнямбал кече «Самырык- влакым тамак да никотин деч аралымаш» теме дене эрта. Молан манаш гын, тӱня мучко 15 гыч 24 ияш марте 17 процент самырык- влак тамакам шупшыт. Европышто гына ийготыш шудымо 11 процент ӱдыр да 14 процент наре рвезе тамак дене пайдалана. Роспотребнадзорын Марий Элысе виктемжат профилактике пашалан да тамакым ужалыме правилым пудыртымым шижтарымылан кугу тӱткышым ойыра, «шокшо линий» телефон дене умылтарымашым пуа. Тений икымше кварталыште гына тамакам ужалыше- влакым шым гана тергыме. 18 объект гыч 11-тыштыже правилым пудыртымым рашемдыме, 39 тӱжем теҥгеаш 10 штрафым тӱлыкташ ыштыме. Акциз марке деч посна ужалыме тӱжем наре пачке сигаретым поген налме.