Йошкар-Олаште у автовокзал суткаште кок тӱжем наре еҥым обслуживатлен кертеш

                        Йошкар-Олаште у автовокзал суткаште кок тӱжем наре еҥым обслуживатлен кертеш. Кызыт автовокзал чолган чоҥалтеш. Регионым виктарыме рӱдерын специалистше- влак у автостанцийым пойдарыме нерген социал сетьлаште калыкын йодышыжым эре  возен шогат. Транспорт министерствын увертарымыж почеш, проектировщик- влак пассажир- влакланат, пашаеҥ-шамычланат чапле йӧным ышташ тыршеныт. У автовокзал Ленин проспектыште «Театральный» микрорайонышто, «Фрау Мюллер» рӱдер воктене верлана. Зданийже ик пачашан лиеш, 850 квадрат метр кумдыкышто чыла кӱлеш инфраструктуро ышталтеш. Йӧнан лийже манын 100 веран вучымо зал ден билетым ужалыме кассе- влак йыгыре лийыт, кугу окнала гыч перрон- влак сайын койыт. Сандене шке рейсым уремыште вучен шогаш кӱлешлыкше ок лий. Тиддеч посна багажым аралыме камере- влак, ужалкалыме да кочмо вер- влак ышталтыт, ава ден йочан пӧлемышт лиеш. Воктелсе кумдыкышто павильонан 10 перрон, автобуслан шогаш 40 вер да шке транспортлан вер- влак ышталтыт. Ик суткаште автовокзал дене кок тӱжем наре еҥ пайдаланен кертеш.
Фото: marpravda.ru