ГИБДД пашаеҥ ден суд пристав- влак парыман- влакым рашемдат

                   ГИБДД пашаеҥ ден суд пристав- влак парыман- влакым рашемдат. Таче Йошкар-Оласе корнылаште парыман- влакым пален налме шотышто мероприятий- влак эртат. Корно правилым пудыртымылан да суд пунчал почеш тӱлен шуктыдымо штраф почеш погынышо парымышт улшо- влакым тергат. Тений идалык тӱҥалтыш гыч ГИБДД дене кылдалтше административный правонарушенийым ыштымылан 292 тӱжемат 360 пунчалым лукмо. Штрафын кугытшо 404 миллион теҥгеш шуын. Тушечын 162 миллион теҥгежым гына тӱленыт. ГИБДД орган- влак суд пристав службыш ӧкым тӱлыкташ 31 тӱжемат 400 утла пунчалым колтеныт. Нунын шотышто кок тӱжемат 300 протоколым возымо.