Йошкар-Ола Марий тиште кечылан ямдылалтеш

                           Марий тиште кече Йошкар-Олаште 8-ше гыч 10-шо декабрь марте эрташ тӱҥалеш. Палемдыме мероприятий- влак коклаште «Марла чын возена»  тӱшка диктант. Тудо Марий университетыште лиеш. 8-ше 9-ше декабрьыште Чавайн лӱмеш книгагудышто Юл кундемысе калык- влакын калыкле книгаштын Регион кокласе кӱкшытан онлайн- фестивальышт лиеш. 9-ше декабрьыште Шкетан лӱмеш театрыште Тиште кечылан пӧлеклалтше Регион кокласе кӱкшытан марий тӱвыра форум эрта. Тудын программыже пеш кумда. Тушто сӱрет да фото выставке, «Марий ӱдырамаш Кугу сарын тулыштыжо» фотоальманахын да калык писатель Леонид Яндаковын «Сар кыша» книгажын  презентацийышт. Шочмо йылмым туныктышо- влак ассоциаций Советын кумдаҥдыме заседанийже, «Марий тиштын ончыкылыкшо» виш мутланымаш да «Марий туныктымо книга» дене кылдалтше семинар, «Мый марла ойлем» акций. «Мунло» интеллектуал марафон, «Ачийжат-авийжат» спектакль да молат улыт. 10-шо декабрьыште Чавайн лӱмеш калыкле книгагудышто «Иван Галкин- лӱмлӧ марий йылмызе» йыргешке ӱстел, «Ойлымо да возымо годым Марий йылмын нормыжым эскерымаш» методик семинар эртат.