«Сияние» техносквер мер комиссийын тергымашыжым эртен
Козьмодемьянск оласе «Сияние» техносквер мер комиссийын тергымашыжым эртен. Оласе яра кийыше вер гыч волгалтше скверым ыштыме. Пашам мучашлыме манаш лиеш. Тудым «Йӧнан оласе кумдыкым ыштымаш» регионысо проект кышкарыште чоҥымо. Кумдыкым кодшо арнян оласе мер комиссий ончен лектын. Тудым чынжымак ужде кодаш ок лий. Тора гычак ятыр тул дене волгалтеш. Аллей да тротуар- влак воктене паркысе понар- влакым, светодиодан светильник- влакым вераҥдыме. Кугыеҥ- влакат, йоча –шамычат шкаланышт келшыше верым муын кертыт. Изи- влаклан кугу модмо комплексым чоҥымо, кугурак- шамычлан йӧнан теҥгыл- влакым ыштыме, йыгыреак урно- влакым вераҥдыме. Ойыртемалтше верлан ротонда шотлалтеш. Тудо кӱкшӧ колонно- влак дене йыргешкын чоҥымо вер. Комиссий объектын ямде улмыжым сайлан шотлен, но иктешлыше решенийым лукташ ситыдымаш- влакым кораҥдаш кӱштымӧ. Оласе кучем ӱшана: у каныме вер оласе калыклан келша да вандал- влаклан нимомат пудырташ огыт пу.
