Концессионный соглашений кышкарыште школым чоҥымо шотышто совещаний эртен

                   Марий Элым вуйлатыше концессионный соглашений кышкарыште школым чоҥымо шотышто совещанийым эртарен. Тыгай йӧн дене Килемар районысо Кумья тӱҥ школ да Йошкар-Олаште «Канде кайык» гуманитар гимназий тунемме тӧнеж- влакым чоҥаш палемдыме. Икмыняр жап ончыч Александр Евстифеев правительствын еҥже- влаклан школым чоҥашлан тӱҥ йодмаш- влакым чумыраш да кажныж шотыштат темлымаш- влакым ямдылаш кӱштен ыле. Кызыт «Сбербанк» ПАО концессионерым палемден. Тиде «Просвещений» нылымше концессий компаний» ушем. Кызыт республикысе финанс министертвын темлымашыжым шотыш налын, соглашенийын финанс модельже ямдылалтеш. Кажне школжо шотыштат чоҥаш тӱҥалме да пытарыме жапымат палемдыме.
                 Чоҥымаш министр Михаил Степанов увертарен: тиде концессионер кызытсе жаплан келшыше тунемме тӧнеж- влакым чоҥа, регион-влак дене сай кылым куча. Тыгай йӧн дене чоҥымо годым окса шагалрак кая. Кумья школым чоҥаш да оборудований дене пойдараш ик ийыште лиеш. «Канде кайык» гимназий шотышто проектлан технический заданий да концессийлан финанс модель ямдылалтеш. Евгений Масловын мутшо почеш, 850 верлан проектым кучылтмо лиеш, чоҥашлан мланде участкым палемдыме. Республикым вуйлатыше тыге иктешлен: чыла йыжыҥжым контрольышто кучаш да жапым чот эскераш кӱлеш.