Йошкар-Ола гыч фигуристка Россий кӱкшытан таҥасымашыште сеҥышыш лектын
«Жигули» таҥасымаште Йошкар-Ола гыч 13 ияш фигуристка сеҥышыш лектын. Ноябрь мучашыште Тольятти олаште «Труд» спорт комплексын ареныштыже фигурнын мунчалтымаш дене Россий кӱкшытан таҥасымаш- влак эртеныт. Тушто мемнан рӱдӧ ола гыч Агнета Латушкина икымше верым сеҥен налын. Кум кечыште элысе 18 регион гыч ий ӱмбаке 120 спортсмен лектын. Нуно икымше спорт разряд, спорт мастерыш кандидат да спорт мастер программе дене таҥасеныт. «Спорт мастерыш кандидат» программе дене 13 ияш спортсменка 32 участник коклаште икымше лийын. Ынде тудо 5-ше гыч 8-ше декабрь марте Москошто Россий Кубкын иктешлыше йыжыҥыштыже шкенжым ончыктышаш.
