Йоча лагерь-влак ямде улыт

Каныме да кап-кылым тазаҥдыме йоча лагерь-влак у тургымлан ямде улыт. Тидым Марий Элым вуйлатыше Александр Евстифеев шкежак терген. Роспотребнадзорын, МЧС-ын, йоча каныш верч мут кучышо исполнительный кучем орган-влакын еҥышт дене пырля тудо Шап ер воктенсе «Кооператор» лагерьште лийын. Икымше тӱшка йоча тушко 5-ше июньышто канаш мия. Марий Элым вуйлатыше малыме корпусым, усталык мастерскойым, модмо пӧлем-влак ден кочмыверым ончал савырнен, туныктымо программа, илыме да каныме условий дене палыме лийын. Лагерь директор Нина Ершован мутшо почеш, тений тушто чылаже 4 тӱрлӧ тематический смена лиеш. Лагерьын кумдыкыштыжо олталтше 4 пу корпус уло, воктенак чыла шотыштат йӧнан санаторий. Тений кеҥежым «Кооператорышто» 500 утла йоча канышаш.