Ял озанлык предприятий- влакым моштен виктарымаш да кугыжаныш полыш ятыр показатель дене республикым вияҥдаш полшат

                   Ял озанлык предприятий- влакым моштен виктарымаш да кугыжаныш полыш ятыр показатель дене республикым вияҥдаш полшат. Республикым вуйлатыше Александр Евстифеев «Семёновский» племзаводыш миен да предприятийын коллективше, вуйлатышыже- влак дене мутланен. Озанлык шӧрым лӱштен налме дене эн сай лектышым ончыкта, идалык еда ӱдымӧ пасу да вольык вуй ешаралтеш. Ӱшанлын вияҥаш племзавод кугыжаныш полышын чыла йӧнжымат кучылтеш, полышым налше ончыл озанлык улеш. Кызыт тушто уло куатын шурным погат, нӧрӧ кормам шапашлат. Вольык чот ешаралт шога. Сандене ӱдымӧ кумдыкат шукемеш. Пашадар шотышто ойлаш гын, тенийсе икымше пелийыште кокла пашадар 44 тӱжем теҥге лийын. Тидыже кодшо ийысе деч 7 процентлан шукырак. Вес ийлан 45-46 тӱжемыш шукташ шонат,- умылтарен озанлыкын генеральный директоржо Александр Козырев. Кызыт тушто 8 тӱжемат кумшӱдӧ наре вуй тӱкан шолдыра вольыкым ашнат. Тушеч кум тӱжемат 700-жо- ушкал. Кумло кум тӱжем наре тонн шӧрым шупшылыт. Ик ушкаллан шотлымаште 9 тӱжемат 300 утла килограмм погына. Республикым вуйлатыше тыгак икияш шыдаҥдым шиймым ончен, пырычам аралыме верыш миен. Иктешлышыла тудо кадр да технике, клатым ямдылыме шотышто сайын ямдылалтмашым палемден.