Калыкым шотлымаш лишемеш

Марий Эл Всероссийский переписьлан ямдылалтеш. Тудо 15-ше октябрь гыч 14-ше ноябрь марте эрташ тӱҥалеш. Тидын шотышто Правительстве пӧртыштӧ переписьлан ямдылалтме да тудым эртарыме шотышто республикысе комиссийын погынымашыже эртен. Тудым Правительстве председательын икымше алмаштышыже, комиссийын вуйлатышыже Михаил Васютин эртарен. Пандемий эре могай-гынат вашталтышым пуртен шога. 28-ше июльышто Россий Правительстве председатель переписьым эртарыме шотышто нормативно-правовой актышке вашталтышым пурташ кӱштен. Маристат тидым кӱчык жапыште ыштен шуктен. Сандене Михаил Васютин тудын коллектившылан таум ыштен. Маристатын увертарымыже почеш, чыла муниципал образований калыкым шотлымашлан ямде. Михаил Зиновьевич переписьыште пашам ыштыше еҥ-влакым туныктен шукташ, калык дене умылтарымаш пашам жапыштыже эртараш кӱштен.