Республикысе 41 школ капитально олмыктымашым вуча

 Марий Элым вуйлатыше Александр Евстифеев Россий Федерацийыште региональный вияҥмаш шотышто Правительственный комиссийын погынымашкыже ушнен. Тудым видеоконференций йӧн дене Россий правительстве председательын алмаштышыже Марат Хуснуллин эртарен.  Каҥашыме тӱҥ йодыш-влак – 2022-шо-2026-шо ийлалан школ-влакым капитально олмыктымаш, «Илыме вер да оласе среда» нацпроектын шукталтмыже, территорийым комплексно вияҥдымаш  да молат. Марий Элыште школ-влакым капитально олмыктымо нерген ойлаш гын, тачысе кечылан 41 тыгай тунемме тӧнежым капиально ачалыман. 5 школын проектно-сметный документацийже ямде. «Илыме вер да оласе среда» нацпроект почеш идалык мучаш марте 370 тӱжем наре квадрат метр илым верым чоҥен шуктышаш улыт. Тиде жаплан 169 тӱжем наре квадрат метрым чоҥымо. Чот тоштемше да аварий лӱдыкшым лукшо пӧртла гыч еҥ-влакым кусарыме программат шукталтеш. 2019-ше-2023-шо ийлалан программыш 400 утла шуко пачеран пӧрт пурен. Территорийым комплексно вияҥдымыланат кугу тӱткыш ойыралтеш. Марий Элым вуйлатыше Александр Евстифеев ик гана веле огыл палемден: «Территорийым вияҥдымаш инфраструктурым уэмдыме, социал тӧнеж-влакым чоҥымо, корным тӧрлымӧ дене иквереш кайышаш».