Александр Евстифеев Россий МЧС министрын алмаштышыже Николай Гречушкин дене вашлиймашым эртарен

                 Александр Евстифеев Россий МЧС министрын алмаштышыже Николай Гречушкин дене вашлиймашым эртарен. Нуно пожар да утарыше подразделений- влакын чаткан пашам ышташышт пайдале вашкылым ыштыме нерген мутланеныт. Тиддеч посна калыкын лӱдыкшыдымылыкшӧ, чодыра пожар шотышто ситуаций да моло йодышымат каҥашеныт. Республикым вуйлатыше министерствын пашажым кӱкшын аклен да мокталтен ойлен. А тул ваштареш кучедалме да вӱдыштӧ лийше эҥгек шотышто элна мучко семынак мемнан денат куштылго огыл, но моло дене таҥастарымаште сайрак коеш. Тидымат ешарен: республике кундемыште сӧснан африкан чума черже рашемын, но калык коклаште эҥгекыш логалше лийын огыл. Мучашлан Александр Евстифеев вакцинаций йодышымат тарватен. МЧС-ын 61 процент личный составше прививкым ыштыктен. Россий МЧС вуйлатышын алмаштышыже палемден: Россий МЧС кышкарыште Марий Эл сай радамыште улеш, паша кӱкшын аклалтеш.