Социал вияҥмаш министерстве йоча- влаклан школыш каяш полшаш ӱжеш

Республикысе социал вияҥмаш министерстве йоча- влаклан школыш каяш полшаш ӱжеш. Икымше сентябрь марте жап шуко ок код. Кажне ача-ава икшывым школыш ямдылаш мыняр окса кӱлешым сайын пала. Сандене неле илыш йыжыҥыш логалше еш- влаклан полшаш социал вияҥмаш министерстве 31-ше август марте  «Еш ешлан полша: школыш ямдылалтына» республике кӱкшытан поро кумыл акцийым эртара. Акций эн ончыч кумыт да утларак икшыван еш- влаклан, тичмаш огыл еш гыч йоча- влаклан, ача-аван полышышт деч посна кодшо икшыве, неле жапыш логалше еш- влаклан полшаш виктаралтын. Тачысе кечылан республикыште тиде категорийыш пурышо 26 тӱжем утла йоча ила. Полыш тӱрлӧ лийын кертеш: шийвундо, вургем, йолчием, канцеляр сату, рюкзак, тыгак аралалтме ӱзгар- влак: маске, перчатке, дезинфицироватлыше средстве. Оксам акцийын операторжо- влакын счётышкышт 25-ше август марте колтыман. Полышым налме пункт- влакым да расчёт счётын номержым министерствын сайтыштыже муаш лиеш.