Пел ийыште аэропорт ӱмашсе деч шукырак еҥым шупшыктен
Юж транспортын федерал агентствыже тений пелийыште Российысе аэропортла гоч калыкым шупшыктымо пашалан иктешлымашым ыштен. Мутлан, Йошкар-Ола аэропорт тений январь гыч июнь марте 6 тӱжемат 800 утла еҥым шупшыктен. Январьыште Йошкар-Ола гыч Санкт-Петербургыш рейсым почмо ыле, арняш кок гана чоҥештылын, а Москош кажне кечын кошташ тӱҥалын. Коронавируслан кӧра чарымашым пуртымо гынат, тенийсе пелийыште ӱмашсе пелий деч калык 300 утла еҥлан шукырак чоҥештылын. Эн шуко еҥ январьыште лийын, эн шагал- апрельыште. Санкт- Петербургыш калык утларак чоҥештылеш, южгунам блетшат ок сите.