МарНИИЯЛИ-лан – 90 ий

Теҥгече «Знак Почёта» орденан, Марий Эл Правительстве пеленысе йылмым, сылнымутым да историйым научно шымлыше Валериан Васильев лӱмеш марий институтым почмылан 90 ий темын. Тиде кечын 1930-шо ийыште институтым почмо шотышто пунчал пеҥгыдемдалтын. Варарак 25-ше октябрьыште Мароблисполкомын Президиумжо МарНИИ-н уставшым пеҥгыдемден. Тунам штатыште 17 еҥ лийын. Статистике, ял озанлык, чодыра озанлык, промышленность да чоҥымаш, флора ден фауным шымлыше, геологий, калык шинчымаш, тазалыкаралтыш, йылме да сылнымут, историй да этнографий секций- влакым ыштыме. Икымше директоржылан Владимир Мухиным шогалтыме. Кызыт тудым Марий Эл Кугыжаныш Погын вуйлатышын алмаштышыже, тазалыкаралтыш, тӱвыра да спорт комитетым вуйлатыше, историй науко кандидат Евгений Кузьмин вуйлата. Кугу лӱмгече дене коллективым Марий Эл Кугыжаныш Погыным вуйлатыше Анатолий Смирнов саламлен.