«Фронтысо пийын портретше» Россий кӱкшытан конкурсыш ушнаш ӱжыт

Самырык сӱретче- влакым «Фронтысо пийын портретше» Россий кӱкшытан  конкурсыш ушнаш ӱжыт. Тудым Сеҥымашын тоштерже ден Российысе военно- исторический ушем эртарат. Сӱретче- влаклан Кугу Ачамланде сарыште ныл йолан йолташ- влакын подвигышт нерген шукырак пален налаш иктыжын портретшым сӱретлаш темленыт. Усталык таҥасымаш  7 гыч 10 ияш, да 11 гыч 17 ияш марте ӱдыр-рвезе- влак коклаште лиеш. Конкурсым 15-ше августышто иктешлат. Сар жапыште пий- влак связист да санитар, диверсант да разведчикат лийыныт, 60 тӱжем пий фронтышто службым эртен. Нуно 700 тӱжем эмганыше салтакым сӧй пасу гыч луктыныт, передовойыш вич тӱжемат 800 утла тонн боеприпасым намиеныт, 8 тӱжем меҥге телефон проводым шупшыныт, 300 танкым пуддештареныт, ныл миллион мина ден фугасым муыныт. Таклан огыл 1945-ше ийыште Сеҥымаш Парад годым Йошкар Площадь мучко тӱшка колонна дене фронтовой пий дене пырля проводник- влак ошкыл эртеныт.