«Воскресение» кычалше студент отряд экспедицийыш кая
«Воскресение» кычалше студент отряд экспедицийлан ямдылалтеш. Тудо Марий университет негызеш пашам ышта. Отрядын боецше- влак Кугу Ачамланде сар эртыме верлашке кычалме экспедицийыш чӱчкыдын лектын коштыт. Мутлан Мурманск областьыште 2004-ше ий годсек кычалмашым эртарат. Тушто 14-ше да 52-шо стрелковый дивизий радамыште Марий Элын шочшыжо- влак ятырын кредалыныт. Пытартыш кум ийыште гына тиде кундемыште Марий Эл гыч 200 утла салтакын лулегыштым муыныт. Мурманск областьысе кычалше отряд- влакын координационный советыштын ӱжмыжӧ почеш «Воскресение» кычалше отрядын 18 еҥже 8-ше гыч 25-ше август марте «Заполярье-2020» кычалме пашаште тыршаш тӱҥалеш. Нуно Кольский районышто лийыт. Лач тушто сар жапыште Марий Эл гыч лу дене салтак кызыт мартеат увер деч посна йомшылан шотлалтыт.