Марий Элым вуйлатыше «Алмаз-Антей» концерныш пурышо «Вымпел» оборонный комплексын генеральный директоржо дене вашлийын
Марий Элын Правительствыж ден «Вымпел» оборонный корпораций промышленность да цифран технологий аланыште кадрым ямдылыме пашам пырля виктараш шонат. Теҥгече Марий Элым вуйлатыше Александр Евстифеев «Алмаз-Антей» концерныш пурышо «Вымпел» оборонный комплексын генеральный директоржо Сергей Боев дене вашлиймашым эртарен. Нуно Марий Кугыжаныш университет негызеш «Вымпелын» посна подразделенийжым почмо да научно- производственный кластерым ыштыме нерген мутланеныт. Тиде рӱдер производствын посна палемдыме задачыж почеш специалистым ямдылаш полша. Тудын пашаже кум корно дене каяш тӱҥалеш. Тиде- школышто тунемше- влаклан ешартыш технический шинчымашым пуымаш, студент- влакым кок корно дене туныктымаш да пашазым ямдылыме шотышто рӱдерын шке пашаже. Регионым вуйлатыше предприятийым вуйлатышылан толмыжлан тауштен да правительстве ончылно кӱкшӧ квалификациян кадрым ямдылыме шотышто шогышо задаче- влак нерген каласкален. Посна подразделенийым ыштымаш корпрораций ден Марий Эл правительстве кокласе пайдале вашкылын икымше опытшо огыл, манын тудо. Тыгай кыл республикын кадр поянлыкшым да вымпелын научно- технический базыжым кучылтын экономикым, промышленностьым, Ай-Ти технологийым вияҥдаш, специалистым ямдылаш полша. Адакшым студент- влаклан пашаверым муаш куштылгырак лиеш. Сергей Боевын мутшо почеш, вашкылым ыштыме деч вара ик ийыште самырык специалист- влакым ямдылымаште сай ошкылым ыштыме. Лицейлаште инженер класс- влак пашам ыштат, Марий университет Москосо физико- технический университет дене кылым куча. Тыгай кыл сай лектышым пуышаш.