Санкт-Петербургышто Марий Элын представительствыже лийшаш

            Юрий Зайцев Санкт-Петербургысо марий землячествын тиде олаште Марий Эл Республикын представительствыжым почмо нерген шонымашыжым сайлан шотлен. Тидын нерген Санкт-Петербургысо Келшымаш пӧртыштӧ Юрий Зайцев землячествын да «Ший корно» марий калыкле- тӱвыра автономийын еҥже- влак дене вашлийме годым ойлен. Марий Элым вуйлатышын сомылжым шуктышо палемден: тыгай организаций- влаклан тӱрлӧ велым полшаш кӱлеш. Шочмо кундем деч тораште илыше еҥ- влакын пырля погынаш, пайремым эртараш, мутланаш йӧнышт лийшаш. Лач тыгай татыште тӱвыра вийым налеш. Нуно тыште пашам ыштат, а чонышт дене шке калыкышт пелен улыт. Ленинград областьын правительствыже Марий Элын деке шӱмаҥын. Икмыняр йодыш уло, ме нуным каҥашаш да полшаш ямде улына. Представительствым почмашым пӱтынек поддерживатлем,- каласен Юрий Зайцев.
             «Ший корно» автономийым вуйлатыше Евдокия Соловьёва организацийым чумырымо нерген ойлен да шушаш ийын тудлан 10 ий темеш манын. Автономийым вуйлатышын алмаштышыже Галина Белашова организацийын тоштерыштыже экскурсийым эртарен. Погынышо- влак тыгак ончыч возымо сем- влакым цифран форматыш кусарыме, этномузыкологий, театр, балет, социокультурный паша дене специалист- влакым ямдылыме нерген ойленыт. Юрий Зайцев Областьысе калык кокласе кыл шотышто комитетым вуйлатыше ден Келшымаш пӧртын директоржылан, автономийын еҥыштлан тауштен да землячествылан полшен шогаш сӧрен.
             Фото: Марий Элым вуйлатышын организаций да аналитик виктемже.