Прокуратурын пресс-службыжо увертара.
Йоча сад- влак воктене прокуратурын йодмыж почеш волгыдым пуртеныт. 11-ше номеран «Гнёздышко» да 24-ше номеран «Весняночка» йоча сад- влак кундемыште ешартыш волгыдым ыштеныт. Прокуратурын тыршымыж почеш тыгак 16-шо номеран школысо кочмыверыште атышӧрым уэмдыме, катлыше тӱран да шелшан ате- влакым кораҥдыме. Тыгай атым СанПинат кучаш ок кӱштӧ. У атышӧрым тунамак маркироватлыме. 35 школышто школ учётышто шогышо йоча- влакын ешышт дене посна эртарыме профилактике пашам тӧрлен колтымо, ешартыш мероприятийым ямдылыме, ача-ава- влакын обязанностьыштым шуктымо шотышто умылтарыме пашам шуктымо. Тиддеч посна кодшо ийын 109 йочан илыме верлан праваштым аралыме. Нунын ача-авашт ава капитал дене илыме верым налыныт, а йочаштлан кумдыкын ужашыжым возыктен огытыл. Кодшо ийын прокуратура 600 гана законым пудыртымашым рашемден, 217 представленийым, 152 протестым возен, судыш 146 йодмашым колтен.
