Ковид чер ваштареш вакцинацийым ыштыме пӱсын шогышо йодыш- влак дене брифинг эртен
Марий Эл Правительствыште ковид чер ваштареш вакцинацийым ыштыме пӱсын шогышо йодыш- влак дене брифинг эртен. СМИ-н еҥже- влак ончылно калыкым увер дене палдарыме шотышто пашам чолган шукташ задачым шындыме. Тидыже кучем орган- влак дене пырля коронавирус инфекций дене чолган кучедалаш полшышаш да калыклан ончычсо илышыш пӧртылаш йӧным ыштышаш. Эн ончыч Правительстве председательын икымше алмаштышыже Михаил Васютин журналист- влакым профессионал пайремышт дене саламлен. Тазалыкаралтыш министр Марина Панькова вирусын осалже нерген умылтарен да вакцинаций дене кылдалтше кокытеланымашым лукшо йодыш- влак нерген каласкален. Пациент- влаклан полыш тичмаш пуалтеш манын тудо, нелын черланыше- влакын чотышт ешаралтмым палемден. Чер мыйым ок тӱкӧ манын шоныман огыл манын палемден. Кажнылан пижын кертеш. Полшаш тӱрлӧ эм уло гынат, южгунам медицинын вийже ок сите. Тудо вӱргорно, иммунный, эндокрин системым, шодым пытара. Неле состояний гыч лукмекат, черле еҥын хронический черже пӱсешт кертеш. Сандене мемнан республике ик эн ончыч реабилитаций пӧлка- влакым почын. Но южо еҥ изиш сайрак лиймым шижмеке эмлалтмым чарна, темлымашым ок эскере. Тыге эмлыме верыш уэш логал кертеш, тыгайже лийын,- каласен министр. Ситуацийым тӧрлаш да семдаш вакцинаций полшен кертеш. Прививкым 19 медицина тӧнеж ышта. Вакциным шке кумылын, кӧн противопоказанийже уке, 18 ияш гыч тӱҥалын ыштат. ОРВИ, шоло чер улмо годым, вакциным температуро тӧрланымек шындат. Антитела уло гынат, шындаш лиеш. Вакцинацийым эртышаш еҥ- влакым кум тӱшкалан шелме. Икымше тӱшкашке медицина, туныктыш, соцобслуживаний тӧнеж да шуко функциян рӱдер- влакын еҥышт пурат.
