Журналист- влак шке профессионал пайремыштым палемдышт

                    Теҥгече журналист- влак шке профессионал пайремыштым палемдышт. Россий печать кечын республикысе правительстве пӧртыштӧ тидын лӱмеш торжественный мероприятий эртен. Тушко тӱшка увер средствылан тӱҥ редакторышт, кодшо ийын лектышыже почеш пашаштым сулен налме награде дене палемдыме журналист- влак погыненыт. Чер лӱдыкшӧ улмылан кӧра, районла гыч журналист- влак видеоконференцкыл йӧн дене ушненыт. Марий Элым вуйлатыше Александр Евстифеев чылаштым профессионал пайрем дене саламлен да СМИ- влакын кӱлешан пашаштым палемден. Пандемий жапыште журналистын пашаже поснак ончыко лектеш: оперативный да чын уверым пуэн шогыман. Тыгак Кугу Сеҥымашлан 75 ий темме да Марий Элын 100 ияш лӱмгечыжым палемдымаште журналист- влак кугу пашам шуктеныт. Ик эн тӱҥ савыктыш- «Марийская правда» газет тений 100 ияш лӱмгечыжым палемда. Тудланат ямдылалташ кулеш,- каласен республикым вуйлатыше. Тыршен пашам ыштымылан Александр Евстифеев таум каласен да сулен налме награде- влакым кучыктен. Республикым вуйлатышын премийжым- «Шӧртньӧ пером» тений Килемар районысо «Восход» газетын тӱҥ редакторжо Любовь Смирнова налын. Республикым социал-экономик велым вияҥдымым эн сайын ончыктымылан мемнан «Марий Эл» ГТРК-н специальный корреспондентше Анастасия Барауля ончыко лектын. Тыгак тӱрлӧ номинацийыште «Знамя» газет гыч Дмитрий Кочергин, «Марий Эл» гыч Алевтина Байкова, «Марий Эл Телерадио» гыч Наталья Ямаева, «Кугарня» гыч Ирина Ямбаршева, «Шернур вел» газет гыч Ирина Казанцева да молат палемдалтыныт. Тендан деч ончыкыжымат оҥай материалым вучена,- каласен республикым вуйлатыше.