Йошкар-Олаште магистральым чоҥымаш пайрем жапыштат чарнен огыл
Йошкар-Олаште Киров ден Строитель уремлам ушен шогышо корным чоҥымаш У ий пайрем жапыштат чарнен огыл. Корным чоҥымо пашан кузе кайымыже да палемдыме кӱкшытыш шумо нерген Российыште регионлам вияҥдыме шотышто правительстве комиссий Президиумын заседанийыштыже ойлымо. Тудым кундемлам вуйлатыше- влак дене Россий Правительстве председательын алмаштышыже Марат Хуснуллин эртарен. Мутланымаш видеоконференцкыл йӧн дене эртен. Эртыше ийын 99 процент пашам 52 регион шуктен. Нуно ужар зонышто улыт. Нарынче зонышто 21 регион тыгай кӱкшытыш шуын огыл, а 11 регион йошкар зоныш пурен. Нуно планын пелыж марте гына шуыныт, - палемден Марат Хуснуллин. Кодшо ийын лектышыже почеш Марий Элна Ужар зонышто улеш. Ушештарена: Йошкар-Олаште кугу проект шыҥдаралтеш. Магистраль урем олан рӱдыжӧ гыч транспортым шагалемдаш полшышаш. Объектын смета почеш акше ныл миллиардат 800 миллион теҥге. Кызыт тушто ик меҥге кужыт мландым нӧлтен оптымо, мланде йымач йолын йолын вончымо верым, кӱварын вич негыз-меҥгыжым ыштыме, ик уштыш утла кужыт газ пучым пужен ыштыме, 680 метр кужыт канализацийым да 80 метр дюкерым пыштыме. Пашан икымше йыжыҥжын икымше да кокымшо комплексшым тений ноябрьлан ыштен шуктышаш улыт. Кумшо да нылымше комплексше шотышо торгым тений эртараш палемдыме. Тудо паша 2022-шо ийын декабрьыште мучашталтшаш. 2022-шо ийыште кокымшо йыжыҥын пашажым шукташ торг эртышаш. Тушто Строитель урем деч кӱртньӧ корно марте инженер сеть пужен ышталтеш, йӱрвӱд йогымо канализаций, Строитель деч Луначарский урем марте корнын кӱлешан пашаже шукталтшаш. Кокымшо йыжыҥ 2023-шо ийын декабрьыште мучашлалтшаш.
