Марий Элыш коронавирус инфекций деч 26 тӱжем утла дозо вакцине толшаш
Февраль мучаш марте Марий Элыш коронавирус инфекций деч 26 тӱжем утла дозо вакцине толшаш. Тидын нерген Александр Евстифеевын эртарыме Оперативный штабын заседанийыштыже тазалыкаралтыш министр Марина Панькова увертарен. Вакцинацийым 19 медицина организаций ышта. Тымарте чылаже кок тӱжемат 292 дозо вакцине толын, 810 еҥлан прививкым ыштыме. Министр тидымат палемден: коронавирусан черле- влаклан полышым пуымо годым у йӧн- влак лектыт. Тачысе кечылан антиковидный плазмым вӱрыш колтымо йӧным ямдылымаш кая. Лишыл жапыште тудо ямде лийшаш. Январь мучаш марте диагностикылан, пневмоний диагнозым рашемдаш КТ рӱдер ямде лийшаш. Марий Элым вуйлатыше республикыш шукырак вакциным кондымо йодышым виктарен колташ кӱштен. Тидлан специалист- влакым да оборудованийым ямдылыман. 26 тӱжем 800 доза тиде шагал, манын тудо. Вакцинаций дене вараш кодына гын, почеш кодшо регион- влак коклаш логалына. 60 процент калыклан прививкым ыштыман,- каласен Александр Евстифеев. Марина Панькова тыгак койко фонд нерген ойлен. Пытартыш кок арнят пеле жапыште черле- влакым эмлыме верыш пыштымаш 4 процентлан шагалемын, но вараш полышым йодмыштлан кӧра, нелын черланыше- влакын чотышт ешаралтын. Амбулаторно эмлалтше- влаклан эмым умбакыже пуэдат. Кызыт эмым кум тӱжемат 800 утла пациентлан пуымо. Пытартыш жапыште ковид диагнозым ик суткаште 49 гыч 51 наре еҥлан шындат. Тӱшкан черланымашым палемдыме огыл. А кылме чер дене черланыше- влакын чотышт кужу каныш жаплан кӧра шагалемын. Туге гынат, Александр Евстифеев калык дене профилактике пашам умбакыже шуяш, транспортышто да тӱшка верлаште маске режимым эскераш кӱштен.
