Оршанке - У Торъял корным олмыкташ тӱналыт

             Республикыштына Оршанке ден У Торъялым ушен шогышо корным олмыкташ тӱналыт. Тиде паша «Качестван лӱдыкшыдымӧ корно» калыкле проект кышкарыште ышталтеш, - увертара «Марий Элысе корно- влак» группа. Корным эше 2020-шо ийыште ачалаш тӱналме. Туге 24-ше гыч 34-ше меҥге марте лу уштыш наре кужыт корным Оршанке районышто Изи Какшан эҥер деч тӱналын олмыктымо ыле. Сакарсолаш пурымо корно марте ачалышаш улыт. Кодшо ийын 45-ше гыч 57-ше меҥге марте ужашым 12 уштыш утла кужытым тӧрлымӧ. Тений Оршанке посёлкын Советский уремже деч тӱналын Кучки ял марте олмыктат. Подрядчик кызытак пашам тӱналын. Олмыктымо программыш  Нурма эҥер гоч пыштыме  30 метр кужытан кӱварымат ачалаш палемдыме. Тудым 1970-шо ийыште чоҥымо. Кызыт тушто пашазе- влак тыршат.
       «Марий Элысе корно- влак» тӱшка гыч фото. «Йошкар-Ола» газет.