Марий Элым вуйлатыше калыклан приёмым эртарен
Марий Элым вуйлатыше калыклан приёмым эртарен. Александр Евстифеевлан виктарыме йодыш- влак туныктымо тӧнежлам олмыктымо, яллаш газым пуртымо, инфраструктуро объект- влакым чоҥымо да троллейбус паркым уэмдыме дене кылдалтыныт ыле. Курык марий кундемысе Микрак кыдалаш школын туныктышыжо Александр Якимов школым капитально олмыкташ йӧным ончалаш йодын. Школым кумло ий ончыч чоҥымо. Туддеч вара капитально олмыктымо огыл. Туныктыш министр Наталья Адамован мутшо почеш школым тений олмыкташ палемдыме. Лу миллион теҥгем ойыраш лийме. Август мучашлан пашам пытарышаш улыт. Козьмодемьянск гыч йоча садын воспитательже Наталья Шемякина туризмым вияҥдаш причалым чоҥаш тӱҥалме жап нерген йодын. Транспорт да корно озанлык министр Александр Герасименко вашештен: вияҥме индивидуал программе дене келшышын, причалым вес ийын чоҥаш тӱҥалыт. Табашинысе фельдшер-акушер пунктым вуйлатыше Надежда Егошина яллаш газым пуртымо йодышым пуэн. Верысе калык тудым шукертсек вуча манын. Промышленность министр Станислав Крыловын мутшо почеш, тенийсе 4-ше кварталлан посёлкыла кокласе 15 меҥге кужытан пучым чоҥаш тӱҥалаш палемдыме. Тудо Клюкино, Воробьи, Видякин, Блиново, Тошто Пижан яллам да Табашино селам уша. Тыге, Табашиныш газ 2022-шо ийын толын шушаш. Приём жапыште тыгак эше ик кӱлешан йодышым каҥашыме: троллейбус паркым уэмдымаш. Предприятийын профушемжым вуйлатыше Оксана Вохминцева вуйлатыше деч йодын: кунам у троллейбус- влакым налаш шонымаш уло? Транспорт министр умылтарен: правительстве ола администраций дене пырля тений 10 троллейбусым налаш палемденыт. Депутат- влак решенийым сайлан шотленыт, бюджет гыч оксам ойыраш кутырен келшыме. Республикым вуйлатыше тидымат ешарен: шушаш ийын автобус паркымат уэмдаш шонымаш уло. Вуйын шогышо еҥ- влаклан ончымо йодыш дене шуктымо чыла жапшым эскерен шогаш кӱштен.