Пачерым чоҥаш оксам тӱлен ондалалтше- влак ынде уке улыт
Республикыштына ондалалтше дольщик- влакын йодышыштым виктарен колтымо. Теҥгече Йошкар-Оласе Йошкар Армий уремыште шуко пачеран пӧртым эксплуатацийыш пуаш разрешенийым налме. Республикыште калыкын оксам пыштен чоҥымо да пашам кужун шуйкалыме тиде пытартыш объект. Тиде пӧртыштӧ вич еҥын праважым пудыртымо. Нуным ондалалтше- влакын реестрышкышт пуртымо ыле. Чоҥаш ойпидышым ыштыме деч вара 20 ий эртен. Пӧрт чоҥалтде шоген. Правительствын тиде объект деке тӱткышым ойырымыжлан кӧра, кодшо ийын подрядчик пӧртым чоҥаш разрешенийым налын. Площадкыште Марий Элым вуйлатыше Александр Евстифеев лийын. 9-ше ПМК-н генеральный директоржо Алексей Яковлевын мутшо почеш, пачер- влаклан кӧргӧ велым отделкым ышташ да еҥ- влакым илаш кусараш чыла ямдылыме. Глава илыме вер- влакым ончен лектын да йӧнан улмыштым, сай пашам палемден. Александр Евстифеев тыге каласен: тиде пешак кӱлешан событий. Ынде «ондалалтше дольщик» шомакым ушештараш ок кӱл, ондалалтше- влак тетла уке улыт. 2018-ше ийыште 17 еҥ окса компенсацийым налын, кызыт вич еҥ пачеран лийын.