«Интеграл» микрорайонышто юж, чынжымак, яндар огыл

                 Рӱдӧ оласе «Интеграл» микрорайонышто углеродын оксидше нормо деч шуко. Промышленный предприятий- влак деч лекше шикшлан Шумелёв уремыште верланыше пӧртлаште илыше- влак деч пурышо шуко вуйшиймашлан кӧра Роспотребнадзор виктем тиде микрорайон гыч налме южым эше чӱчкыдынрак терген. Февральыште тергымаш ончыктен: эрдене да кастене тиде верлаште углеродын оксидше нормо деч кугурак лийын. Анализын лектышыжым, мардежын кушечынла пуымыжым, амыртышын могай улмыжым, транспортын эн шуко коштмо жапшым шотыш налын, тыгай иктешлымашым ыштыме: южым амырташ, очыни,  Строитель, Машиностроитель, Бауман, Шумелёв уремла дене транспортын, тидын шотыштак неле грузан машина- влакын,  шуко коштмышт амалым ышта. Южым саемдаш да тудо тазалыклан эҥгекым ынже кондо манын чаракым ышташ, уверым Пӱртӱс поянлык, экологий да йырым йырысе средам аралыме шотышто министерствыш, ола администрацийыш, пӱртӱсым оролышо прокуратурыш колтымо. Йошкар-Ола администрацийыш автомагистраль воктене, илыме кумдыклаште пушеҥге ден кушкылым шындаш, транспорт развязкым ышташ да моло темлымашымат колтымо. Уверым Правительстве мартеат шуктымо. «Интеграл» микрорайонышто южым тергымаш умбакыже шуйна.