Шошын волгыдо пайремже лишемеш

                      Республикысе ӱдырамаш- влак- профессионализмын да чолга илыш позицийын волгыдо примерже улыт. Тидын дене верысе ӱдырамаш- влак сайын ойыртемалтыт. – манын каласен таче республикым вуйлатыше Александр Евстифеев Марий Элысе ӱдырамаш актив дене вашлиймыж годым. Тудо палемден: совет жапыште республике гыч Социалистический пашан Геройжӧ лӱмым налше 23 еҥ гыч шымытше ӱдырымаш улыт. Марий Элым вуйлатыше дене вашлиймаште тӱрлӧ пашаште тыршые еҥ- влак лийыныт: врач, туныктышо, тӱвыра, спорт пашаеҥ, амалкалче, ялыште тыршыше да мер пашаеҥ- влак. Евстифеев палемден: погынышо- влакым чылаштым ик тӱҥ койыш ушен шога: пашам лийжак манын ыштымаш, коллективым пагалымаш, лишыл еҥым, ешым, шочмо республикым йӧратымаш. Ме 8-ше март вашеш вашлийына. Сандене чыладамат мотор пайрем дене саламлем, -  каласен тудо. Республикым социал-экономик велым вияҥдымашке надырым пыштымлан да тыршен ыштымылан Российысе Ӱдырамаш-влак ушемын регионысо пӧлкажым вуйлатыше Нина Ивановалан «Марий Элым ыштымылан 100 ий» шарнымашан медальым кучыктымо. «Илалше- влакын университетыштын» директоржо, Марий Университетын профессоржо Наталья Моровалан Республикым вуйлатышын тауштымашан серышыжым пуымо. Тыгаяк тауштымаш дене «Волжск оласе ончыкылыкан йоча» мер организацийым вуйлатыше Александр Алексеева, Марий Турек район гыч шуко шочшан ава Елена Ведерникова, Республикысе коваште да венерологий диспансерын тӱҥ врачше Дарья Лучинина, Курык марий районысо Шындырял тӱвыра пӧртым вуйлатыше Раиса Капитонова палемдалтыныт.