Тазалыкаралтыш министерствылан 12 миллион теҥгем ойырымо
Республикысе тазалыкаралтыш министерствылан калыклан яра эмым ситараш, калыкле проект- влакым шыҥдараш да моло сомыллан 12 миллион теҥгем ойырымо. Марий Элым вуйлатыше Александр Евстифеев Правительствын распоряженийжым пеҥгыдемден. Тудын дене келшышын республикын бюджетше гыч тазалыкаралтыш министерствылан тиде оксам кусарыме. Куд миллион утла теҥге шийвундыжо стационар медицина полышлан кая, 200 тӱжем теҥгеже амбулаторный полышлан, вич миллионат 500 тӱжем теҥгеже тазалыкым аралыме моло сомыллан. Министерствын увертарымыж почеш, ик миллионат 600 тӱжем теҥгеже посна тӱшка калыклан яра эмым да медицина изделийым налаш колталтеш. Тазалыкаралтышын первичный звеножым уэмдыме регионысо программылан кок миллионат 400 тӱжем теҥгеже кайышаш.