Артём Коровин Тӱнян кубокыштыжо таҥасаш Российын сборный командышкыже пурен
Артём Коровиным Тӱнян кубокшын йыжыҥыштыже таҥасаш Российын сборный командышкыже пуртымо. Тудо байдарка да каноэ дене тӱня кубкын кокымшо йыжыҥыштыже шке куатшым ончыкта. Тиде таҥасымаш 20-шо 23-шо майыште Барнаулышто лиеш. Тудо Токиошто эртышаш Олимпий модмашке ойырен налашлан иктешлыше квалификаций турнир лиеш. Чылаже 38 комплект медаль да олимпий лицензийын куд комплектше модалтеш. Алтай крайын рӱдӧ олашкыже тӱнямбалсе 50 эл гыч 20 тӱжем уна, спортсмен да ончышо- влак погынат. Российын сборныйыштыжо байдарка-двойка дене Омск область гыч Алексей Шишкин дене пырля Волжск ола гыч Артём Коровин таҥасаш тӱҥалеш. Нуно тӱжем метрыш иймаште таҥасат. Артёмлан тиде кугыеҥ- влак кӱкшытыштӧ икымше тӱнямбал старт лиеш.