Калык- влакын келшымаш пӧртышт чоҥалтеш

                      Марий Элым вуйлатыше каласен: «Пашам чулымын тӱҥалме. Калыкле республикыште «Келшымаш пӧрт» кок ий гыч ямде лиеш». Йошкар-Олаште Калык- влакын келшымаш пӧртыштым нӧлтат. Тушто пашам мартыште тӱҥалме. Чоҥымо паша Россий правительствын полшымыжо да федерал субсидийым ойырмыжлан кӧра шыҥдаралтеш. Марий Элым вуйлатыше тиде йодыш дене премьер министр Михаил Мишустин, полномочный представитель Игорь Комаров дене вашлиймаш- влакым эртарен. Тыге Россий правительствым вуйлатыше кодшо ийын тиде пашалан 700 миллион теҥгем ойыраш кӱштымашым пеҥгыдемден. Республикым вуйлатыше Александр Евстифеев чоҥымо площадкыш миен да пашан кузе кайымыжым аклен. Чоҥымо пашам «Казанский посад» ушем шукта. Тудым вуйлатыше Руслан Муталиевын мутшо почеш, подвалын пырдыжшылан гидроизоляцийым ыштыме да пырдыжшым ырыктыме, монолит  перекрытий- влакым велыкташ тӱҥалме, вашке кермыч паша тарвана. Пашам жапыштыже шукташ сӧрат. Республикым вуйлатыше тидымат ешарен: «Калык- влакын келшымаш пӧртышт» кӱлешан объект. Пытартыш жапыште кужун чоҥалтше икмыняр объектым ыштен шуктымо. Тиде объектат шуко ий савар шеҥгелне шоген. Республикыште 50 
утла тӱрлӧ калык ила, 32 калыкле-тӱвыра мер ушем- влак пашам ыштат. Нунылан пырля келшен пашам ышташ чапле вер лийшаш. Пӧрт пӱтынек 2023-шо ийын икымше пелыштыже ямде лийшаш.