Александр Евстифеев «Демографий» калыкле проектым шыҥдарыме йодыш дене совещанийым эртарен

                      «Демографий» калыкле проектлан кӧра Марий Эл кужун ончымо системым шыҥдарыше пилот регион- влак радамыш пура. Республикым вуйлатыше Александр Евстифеев «Демографий» калыкле проектым шыҥдарыме йодыш дене совещанийым эртарен. Тушто йоча шочмеке ешлан полышым пуымо, кугурак тукымын илышыжым саемдыме, еҥ- влакым таза илыш йӱлалан кумылаҥдыме, калыклан пашаверым ситарыме йодышым ончымо. Социал вияҥмаш министр Марина Островскаян мутшо почеш, ешлан полышым пуымо шотышто икымше йоча шочмеке тылзе еда окса тӱлалтеш, кумшо да моло йоча шочмеке кум ийым темымешкышт, тыгак нылымше да моло йоча шочмеке регионысо ава капитал пуалтеш. Кугурак тукымын илышыжым саемдыме нерген ойлымо годым министр палемден: регионысо проект тичмаш шукталтеш, стационар организаций- влакын материально- технический базышт пеҥгыдемеш, медицина оборудований, мебель налалтеш. Тидымат ешарен: шушаш ийын республике кужун ончымо системым шыҥдарыше пилот регион- влак радамыш пура. Нелын черланыше- влакым мӧҥгыштӧ ончымылан кӧра, стационар организацийлашке шагалрак еҥ колталтеш. Методика полышым «Старость в радость» поро кумыл фонд пуа. Стационар йӧнлаште илыше- влаклан яра пӱй протезым ыштат, катарактым эмлат. Илалше- влалкан «Кичиер» санаторий пашам ышта. «Кугурак тукым» федерал проектым илышыш шыҥдарымаш кугурак тукымын илыш качествыжым саемдаш да ӱмырым шуяш полша. Таза илыш йӱла нерген ойлымо годым медосмотр да диспансеризаций нерген каласкалыме. Тений 166 тӱжем утла еҥым тергышаш улыт гын, кызыт 46 процент еҥ диспансеризацийым , 32 процент медосмотрым эртен. Пашаш пураш полшымо нерген ойлымо годым тидым палемдыме: кызыт ныл йоча сад чоҥалтеш, 575 ясле верым ыштышаш улыт. Паша да пашавер департаментым вуйлатыше Александр Лазарев тыгак шуктымо паша нерген ойлен.