Йошкар-Олаште «Эвелин» велопарад лиеш

           «Эвелин» велопарад Йошкар-Оласе транспортын маршрутышкыжо вашталтышым пурта. Тудым эртарымылан кӧра южо уремыште кок кече транспортлан каяш чаралтеш. Ола администрацийын увертарымыже почеш 10-шо июньын 18 шагат гыч 11-ше июньын 20 шагат марте Волков уремын Гоголь урем деч Ленин проспект марте ужашыштыже да Ленин площадьыште корно петыралтеш. 11-ше июньын 10 шагатат 30 минут гыч 14 шагатат 30 минут марте Комсомол уремын Пушкин урем ден Ленин проспект марте ужашыштыже транспорт каен ок керт. Тыгак 11-ше июньышто 11 шагатат 55 минут гыч 14 шагатат 5 минут марте Ленин проспект дене Машиностроитель ден Советский урем марте, Советский урем дене Ленин проспект деч Йошкар Армий урем марте, Йошкар Армий урем дене Советский деч Машиностроитель урем марте, Машиностроитель урем дене Йошкар Армий деч Ленин проспект марте ужашыште тӱткӧ лийман.
             Фото: Йошкар-Олан администрацийже (архив), МариМедиа.