Марьино-Юрино автомобиль корнын чыла ужашыжым тений олмыктен шукташ кӱлеш

                Республикым вуйлатышын сомылжым шуктышо Юрий Зайцев Юрино районыш мийымыже годым тыгай задачым шынден: Марьино-Юрино автомобиль корнын чыла ужашыжым тений олмыктен шукташ кӱлеш.  Транспорт да корно озанлык министр Александр Герасименко увертарен: кодшо ийын корнын кок ужашыжым 16 меҥге утла кужытшым олмыктымо да 197 миллион теҥгем кучылтмо. Тений эше 14 меҥгым ачалаш палемдыме, а пытартыш ужашыже- 11 меҥгат пеле кужытшым 2023-шо ийлан палемдыме. Тичмаш налмаште 42 меҥге кужыт олмыкталтеш. Паша графикым ончылтен шукталтеш. Эше кодшо ийын «Поветлужье» корнын ужашыжым федерал погыш кусарыме ыле. Тыге Йошкар-Ола –Юрино корным пӱтынек нормативыш кондаш йӧным ышта. А республикысе корным тичмаш налмаште тенийлан 301 меҥге кужытлан оксам ойырымо. Шушаш ийлан палемдыме корно гыч 40-50 меҥгыжым  тений ышташ шонена. Тиде шукталтеш гын, идалык мучашлан кум тӱжем меҥге корно гыч тӱжемже нормо дене келшен толшо лиеш. Тыге 2024-ше ий мучаш марте корнын 89-90 процентше ямде лийшаш.
             Фото: Марий Элым вуйлатышын организаций да аналитик виктемже.