Рӱдӧ олаштына школ ден йоча садла деке корным олмыктат
Рӱдӧ олаштына школ ден йоча садла деке корным олмыктат. «Качестван лӱдыкшыдымӧ корно» калыкле проект школ маршрут, йоча тӧнежла деке намийыш корнылам тӱткышыштыжо куча. Кеҥеж каныш жапыште подрядчик- влак нине корным у тунемме ийлан ямдылат. Паша комплексно шукталтеш: корным олмыктымо деч посна йолешке вончем- влакым, корно палым, разметкым тӧрлат. Кызыт нуно Бауман уремыште пашам шуктат. Тудо вигак кок школ деке намия: Бауман лицей ден 23-шо номеран школ деке да 19-ше номеран йоча сад деке. Кок меҥге наре кужыт корно олмыкталтеш. Тений тыгак Чехов уремыште паша шукталтеш. Тушто 7-ше номеран школ, 8-ше, 58-ше да 70-шо номеран йоча сад- влак верланеныт. Калыкле проект почеш олмыктышаш планыш тыгак кокымшо школ да 35-ше йоча сад деке намийыше Осипенко урем, Ломоносов лӱмеш лицей деке Успенский урем, политехник лицей –интернат, марий чодыра озанлык техникум ден 55-ше йоча сад деке намийыше Карл Либкнехт уремлам пуртымо.
