Ял озанлыкыште тыршыше- влак Кугыжаныш награде дене палемдалтыныт

Кугарнян республикысе ял озанлык пашаеҥ- влак шке пайремыштым палемдышт. Нуным профессионал кечышт дене республикым вуйлатыше саламлен. Агропромышленный комплекс республикысе экономикын ик эн кӱлешан ужашыже. Регионысо валовой продуктын 20 процентшым айла. Яллаште республикысе калыкын 34 процентше ила. Тенийсе индеш тылзе жапыште аграрий- влак 47 миллиард теҥгеаш продукцийым ыштен луктыныт. Ял озанлык сатум лукмо индексше 110 процентым эртен. Тидыже Юл кундем округышто кокымшо показатель. Москошто эртыше «Шӧртньӧ шыже» выставкыште Марий Эл 30 медальым сеҥен налын. Тушечын 18-же – «шӧртньӧ». Ончылно эше кугу паша- влак вучат. Тудым шуктымаште мемнан эн тӱҥжӧ калыкна уло: опытан вуйлатыше, грамотный специалист, пашам йӧратыше механизатор, агроном, вольыкым ончышо, фермер да перерабатыватлыше промышленностьын пашаеҥже- влак, - каласен Александр Евстифеев. Вара ойыртемалтше пашаеҥ- влаклан кугыжаныш награде- влакым кучыктен.  Шернур районысо «Земледелец» озанлыкын тракторист- машинистше Станислав Клепиковлан «Россий Федерацийысе ял озанлыкын сулло пашаеҥже» кӱкшӧ лӱмым пуымо. «Республикысе ял озанлыкын сулло пашаеҥже» чап лӱмым Советский район гыч Галина Богданова, У Торъял гыч Любовь Корчемкина, Медведево гыч Анатолий Кузнецов, Марий Турек гыч Владимир Наумов, Морко гыч Арнольд Оразаев, Медведево район гыч Абдусамад Жахбаровлан пуымо. Тыгак икмыняр еҥ Правительствын Чап грамотыж да Республикым вуйлатышын Тауштымашыж дене палемдалтын.