«Лунчыргышо корнын» интерактивный картышкыже пуртымо 13 корно ужашым олмыктымо

Марий Элыште «Лунчыргышо корнын» интерактивный картышкыже пуртымо 13 участке кораҥдалтын. Тений тиде картыш чылаже 21 начар участкым пуртымо ыле. Тушечын 13-шым олмыктымо. Нуно Йошкар-Ола, Волжск, Козьмодемьянск олала, Куженер, Медведево, Курык марий, Советский да Звенигово районлаште верланеныт ыле. Тений идалык тӱҥалтышыште ОНФ-ын еҥже- влак темлымашым Республикым вуйлатыше Александр Евстифеевлан пуэныт. Тушто начар корнын рейтингыштым ыштыме ыле. «Лӱдыкшыдымӧ да сай качестван автомобиль корно- влак» калыкле проектым шыҥдарыме годым калыкын шонымашыжым шотыш налыт манын ӱшаным каласеныт ыле. Корно спискым кок ужашлан пайлыме. Икымше 10 начар корно радамыш Йошкар-Оласе калыкын темлыме, кокымшыш- районлаште илыше- влакын темлыме корнышт пурен. Тыге ятыр корным олмыктен шуктымо. 2022-шо ий марте планыш эше Шернур да Советский районласе кок участкым пуртымо. Ыштыме корно гыч Куженер районысо Йырмарий ялыш чоҥымо корным палемдаш лиеш. Йошкар-Олаште Анциферов, Дружба, Подольскысо курсант- влак, Васильев, Анников, Фестивальный уремлам олмыктымо. Начар радамыште эше Ползунов, Черняков, Складской урем- влак кодыт. «Пытыше корнын картыже» проект 2017-ше ий годсек пашам ышта. Тиде жапыште 729 меҥгыш шуйнышо  503 корно участкым пуртымо ыле. 62 корным капитально олмыктымо,  37 корнышто лакылам тӧрлымӧ.