Марий Элым вуйлатыше Александр Евстифеев «Т Плюс» акционер ушемын генеральный директоржо Андрей Вагнер дене пашаче вашлиймашым эртарен
Марий Элым вуйлатыше Александр Евстифеев «Т Плюс» акционер ушемын генеральный директоржо Андрей Вагнер дене пашаче вашлиймашым эртарен. Мутланымаште акционер ушемын гендиректоржын кучем орган дене кылым кучымо шотышто алмаштышыже Сергей Говорун, «Марий Эл да Чуваший» филиалын директоржо Сергей Ушаков, Марий Элын министрже Николай Коротков да экономически вияҥмаш министр Дмитрий Пугачёв лийыныт. Вашлиймаште кок йодышым каҥашыме. Тиде шыже-теле жаплан ямдылалтмаш да республике кундемыште паша лектышым кугемдаш компанийын темлымашыже. Мутланыме годым республикысе теплосеть комплексым ончыкыжо вияҥдыме да инвестиций проект- влакым шыҥдарыме йодышымат тарватыме. Андрей Вагнерын мутшо почеш, шыже- теле жаплан ямдылалташ компаний 167 миллион теҥгем ойырен. Пашам кокымшо ТЭЦ-ын оборудованийыштыже да теплосетьлаште, зданий ден сооруженийлаште шуктымо. Шокшым ситарымашын качествыжым да ӱшанлыкшым кугемдаш манын, тений тепломагистральым Медведево посёлко велышкыла шупшаш тӱналме. Тидыже улшо нелытым кокымшо ТЭЦ ӱмбак кусараш йӧным пуа. Идалык мучаш марте ик меҥге кужыт пучым пыштыме лиеш. Республикым вуйлатыше у пашаверым ыштыме, пашадарым кӱзыктымӧ да пашазе- влакын социал гарантийыштым арален кодымо нерген ойлен. Тыгак тудо чыла муниципал образованийыште илыше- влаклан чарныде шокшым ситарыме йодышым республикысе кучем контрольышто куча манын палемден. Погынышо- влак тыгак тарифым виктарыме, пайдаланымылан оксам тӱлымӧ нергенат ойленыт.